قصيدة للشاعر محسن الخزندار بعنوان إحنا أهل غزه

الشاعر محسن الخزندار
إحنا أهل غزه
ياللي ما بتعرف أهالي غزه
ما عرفت ناس عندهم عزه
إن كنت رايح على جحر الديك
ريح بير السبع بتناديك
سلم على حي الزيتون
أتنسم عطر البرتقال والليمون
وقف على تل المنطار
حي الشجاعيه معقل الثوار
حود على حي الدرج
فكر الثورة منه درج
عدي على حي التفاح
ريح الثورة منها فاح
غرب على الشيخ عجلين
فيها إرث الكنعانيين
وتذكر الشاطئ والرمال
رجالها ما بينشروا بالمال
وأتمهل وأنت رايح علي جباليا
حاتلاقي رجال همتهم عالية
وهدي ببيت لاهيا
مستوطنات العدو غارت في داهية
واذا وصلت بيت حانون
تلاقي الضيف غالي ما يهون
ما أحلى ما تسمع في البريج
مواويل وأغاني وأهازيج
ولا تنسى تزور المغازي
العاصية على كل غازي
وسلم على أهل النصيرات
اللي جاهزين دايما للنصرات
عرف الاحتلال في المعسكرات
الموت و الخوف والآهات
رجال الزوايده و المصادير
خرجوا للوطن مغاوير
وتذكر أتمسى على أبو العجين
كرمة عنب و زيتون وتين
وأنت مقبل على دير البلح
شوف خير النخل لما طرح
وتمشي علي القرارة
لقي اهلها ود وحرارة
وخانيونس ما فيها بيت ما نهان
ولكن من القلعة ما حد خان
وقبل على بني سهيلا
الكل فيها أهل و عيلا
ما اتهاب تزور عبسان
الغريب فيها عمره ما ينهان
يا محلا زيارة خزاعة
فيها العمارة والزراعة
سلام عليكي يا رفح
من الظلم الكيل طفح